День самоуправления
Дзень настаўніка – цёплае і кранальнае, адно з самых любімых святаў, якія адзначаюцца ў нашай гімназіі. Дзень самакіравання – незвычайная і доўгачаканая падзея для ўсіх вучняў гімназіі, асабліва для 11-класнікаў, якія традыцыйна ў гэты дзень “бяруць уладу ў свае рукі”.
Святочны настрой, добразычлівыя ўсмешкі і цёплыя словы, адрасаваныя любімым настаўнікам, напоўнілі раніцу 2 кастрычніка. Яшчэ на ўваходзе педагогаў сустракалі вучні з кветкамі і шчырымі віншаваннямі з нагоды Дня настаўніка. Празвінеў званок – і 11-класнікі накіраваліся ў класы на свае “працоўныя месцы”. А настаўнікаў чакаў яшчэ адзін сюрпрыз: яны сталі вучнямі 12 “А” класа. Для такіх асаблівых вучняў быў складзены нават спецыяльны расклад: руская мова, матэматыка, геаграфія, мастацтва.
Вельмі адказна падышлі 11- класнікі да арганізацыі дня самакіравання: загадзя размяркоўвалі свае абавязкі, распрацоўвалі планы ўрокаў, разам з класамі, у якіх выконвалі абавязкі класнага кіраўніка, рыхтавалі святочныя паштоўкі і відэавіншаванні для настаўнікаў. На працягу ўсяго працоўнага дня “новыя” дырэктар і яго намеснікі пільна сачылі за парадкам у гімназіі. А закончыўся святочны дзень віншавальнай канцэртнай праграмай “Любімым настаўнікам прысвячаецца...”.
Падводзячы вынікі, вучні 11-ых класаў адзначылі, што, дзякуючы дню самакіравання, яны змаглі адчуць, якая нялёгкая і адказная, але незвычайна цікавая праца настаўніка, для якой неабходны своеасаблівы талент і прызванне. А для кагосьці з будучых выпускнікоў, магчыма, гэты дзень стаў вызначальным ў выбары прафесіі.
Свята настаўнікаў і дзень самакіравання надоўга запомніцца педагогам і вучням гімназіі як адзін з самых яркіх дзён нашага гімназічнага жыцця!
Вольга Калеснікава, настаўнік беларускай мовы і літаратуры гімназіі №1 г.Іўя
